اختفاء غامض لـ3 فتيات في ظروف غامضه

 قصة اختفاء غامضة ومختلفة من نوعها اختفاء غامض ومريب لفتيات منطقة سبرينج فيلد بولاية ميزوري تم تصنيفها على انها واحدة من اكثر قصص الغموض في التاريخ اختفاء لـ 3 فتيات بشكل غامض ،غريب وفى ظروف مفاجئة بدون أي أثر، والغموض يكمن في الأدلة والشاهد الوحيد في هذه القضية لن يتحدث أبدأ ،قضيه The Springfield Three

قضيه The Springfield Three

تفاصيل ما قبل واقعة الاختفاء 

في يوم 6 يونيو سنة 1992 دا كان يوم حفلة تخرج فتاة تدعى سوزي ستريتر و فتاه أخرى تدعى ستايسي مكول من المدرسة الثانوية، و اليوم دا واللي بعده كانوا أيام احتفالات في المدينة لان كل المدارس كانت تحتفل في نفس اليوم ,مدينة سبرينج فيلد في ولاية ميزوري .

مسيرة الاحتفال كانت من الساعة 4 الى الساعة 6 بليل وبعد كدا الناس بتكمل احتفالات بس كل واحد او كل مجموعه فتيات تحتفل بدماغها ،وكانت خطة الفتيات دول اللي هما ستايسي وسوزي ا توجههن مساء هذا اليوم الى فندق في المدينة يسهروا فيه ويباتوا فيه وفى الصبح يتحركوا مع باقي الجروب على الحديقة المائية لحضور حفلات التخرج .

بس هما غيروا الخطة دي كلها وما راحوا الفندق اتفقوا انهم يروحوا يباتوا عند فتاة صديقتهم  اسمها جانيل كان في حفله جنبها وهى ما كنتش أصلا ها تروح الفندق زي باقي المجموعة , ستايسي هنا اتصلت بأمها وقالت لها انها مش ها تروح الفندق خلاص هي ها تروح حفله عند صاحبتها جانيل هي وسوزي ويباتوا هناك وبعد كدا يروحوا الحديقة المائية ،بس اكدت عليها انها لما تصحى وقبل ما تروح الحديقة تتصل عليها تطمأنها .

بعد كدا هما راحوا الحفلة اللي جمب جانيل وقعدوا وانبسطوا وخلصوا حوالى  الساعة 2:00 صباحًا يوم 7 يونيو ، ومشوا من آخر حفلات التخرج القليلة اللي حضروها اليوم دا.

بس في مشكله منزل جانيل كان في أهلها كلهم كانوا جايين يقضوا الويك اند ويحتفلوا بتخرج جانيل والبيت زحمه جدا .

سوزي قالت ستايسي احنا خلاص نروح ننام عندي في البيت، الليلة دي والصبح نروح الحديقة اللي هو بيت والدتها (شيرل ليفت)اللي كان عندها 47 سنه وعزباء وشغاله مصفف شعر في احد المراكز التجميل ، وهنا هما غيروا خطتهم للمرة الثانية ، بس المرة دي ستايسي ما قالت أمها زي المرة الأولى .

وقبل ما نتكلم في باقي تفاصيل اختفاء الفتيات عايز اديك لمحه عن حيات فتاتين فتاة سوزي و الفتاة ستايسى عشان تتخيل معاياة اللي حصل ولازم تكون فاكر ان الاحداث دي كانت 1992.

ستايسي 

دي كانت تبلغ 19 عام وكانت عايزة تدخل جامعة ميزوري وكانت تشتغل موديل يعنى بتعرض ملابس للمحلات كأعلانا بس دا مكنش شغل أساسي ليها 

بالنسبة لسوزي 

كانت تبلغ  18 عام و كانت معروفه بالصراحة والالتزام والدقة والترتيب الغريب هنا ان سوزي دي كانت تحب الباد بوى اللي هما الولاد اللي بيكون ليهم شلة كدا في المدرسة ويمشوا وراه وبيكون كبير الشلة دي وبيغلسوا على باقي المدرسة ,وبيكون حواليهم بنات بردوا هي كانت تحب النوع دا من الولاد مع ان دا عكس شخصيتها تماما .

يوم واقعة اختفاء فتاتين قاصرتين لم تتجاوزا ال20 عام

الساعة 9 الصبح يوم 7 يونيو جات فتاة تدعي  جانيل ,ومعاها صديقها مايك على بيت سوزي وقعدت تخبط بس محدش رد هي قالت اكيد لسه نائمين عشان سهرة مبارح وهى أصلا كانت اتصلت عليهم عشان تصحيهم بس بردوا محدش رد .

هما لقيوا 3 سيارات موجوده قدام البيت سيارة سوزى وسيارة ستايسي وسيارة شيريل اللي هى ام سوزي ودا اللي اكد انهم نائمين .

بس كان في قزاز متكسر قدام الباب على طول ومايك اخد زي مكنسة كدا ولم القزاز على جمب عشان محدش يتأذى من القزاز ,بس هما استغربوا مش عارفين القزاز دا جاي مينين بس كان في لمبة قدام الباب حوليها زي فانوس قزاز كبير وهو دا اللي كان مكسور بس اللمبة كانت سليمه .

المهم ان محدش رد بردوا فتلقائيا حاولوا يفتحوا الباب ويدخلوا واستغربوا جدا ان الباب كان مفتوح أصلا هما أزاي نائمين كدا والباب مفتوح ،مش متأمن خالص فدخلوا وهما لسه مستغربين ,والبيت كان مظلم لان الستائر مقفولة ،مكنش في أي حركة في البيت غير الكلبة بتاع سوزي اللي اسمها سينمن وكان شكلها غريب على غير عادتها ولاحظوا كمان ان التليفزيون بتاع غرفة المعيشة كان شغال وكان بس بدون اشاره ودخلوا راحوا يشوفوا غرفة سوزي فليقوها فاضيه فيهاش احد ونفس القصة غرفة شيرل ما فيهاش حد .

تحقيقات في واقعة اختفاء غامض لـ3 فتيات 

بس الغريب اللي اكدوا اكتر من حد هو وجود 3 شنت جمب بعض في الطرقة هما شنطة سوزي وستايسي وشيريل ،جانيل قالت هما اكيد صحوا بدرى وراحوا الحديقة المائية .بس بردوا من جواها ماكنتش مرتاحة بسبب الشنطة وشكل سينمن الغريب .

على بعد الضهر كدا ام ستايسي اتصلت على بيت جانيل عشان تطمن على بنتها هي متعرش انها راحت مع سوزي زي ما قلنا . واهل جانيل قالوها انها باتت عند سوزي فاتصلت على بيت سوزي وطبعا محدش بيرد . واساسا ام ستايسي وشيريل أصحاب هي مستغربه ان محدش بيرد وهنا اشتغل قلب الام ووصلها إحساس مش حلو فراحت بنفسها لبيت سوزي وفى نفس الوقت جانيل ومايك كانوا خلصوا الحديقة المائية ومقابلو البنات هناك فرجعوا على بيت سوزي . 

وهنا تقابلوا مع ام ستايسي ودى الحظة  اللي تأكدوا فيها ان الامر مش مضبوط ،فى حاجه غلط هي لحظه صعبه بصراحة فكروا مع بعض انهم يفتشوا في البيت ممكن يلاقوا أي حاجه بتدلل على مكانهم ، البيت كان نضيف ومرتب زي عادته بس اللي خلى ام ستايسي تقلق هو وجود ال3 شنت على الأرض . وطريقة ترتيبهم على الأرض يعنى هما مكا نوش مرممين كدا نتيجة سرقه ولا حاجه لا دول كانوا محطوطين جمب بعض زي التجهيز للخروج كدا .

فتشت الام شنطة بنتها عشان تشوف ايه اللي اخدته والمفاجئة انها لقيت كل حاجتها موجوده في الشنطة ,وكمان فتشت باقي الشنطة لقيت كل حاجتهم موجوده المحافظ والفلوس وكل معلقاتهم الشخصية موجوده .وكمان شيرل كانت مدخنه بطريقه شرهة والسجاير بتاعتها والولاعة كانوا موجودين في الشنطة .بس ليه كلهم اختفوا ,ولو البنات راحوا لحد من صحابهم ولا راحوا يكملوا احتفال ليه ما خدوش الشنطة وحاجتهم معاهم .

دخلت غرفة سوزي لقيت انهم مطبقين ملابسهم اللي كانوا مفروض يلبسوها بالاكسسورات وكل حاجه يلبسوها كانت مطبقه ومرصوصة جمب بعض يعنى كانوا مجهزين نفسهم لليوم بس دا ما حصل لسبب ما محدش عارفه .هنا الام قلقت جدا وبدأ الخوف يسيطر عليها ،علطول راحت تتصل على والدها عشان يساعد في البحث بس وهى رائحة تتصل لقيت في بريد صوتي على التليفون فسمعتها لقيتها من شخص بيقول كلام وحش وبشتم . الرسالة دي اتمسحت بالغلط 

كل دا والوقت بعدى والناس بتزيد في المكان زي باقي العيلة والأصدقاء ومحدش فيهم ظهر لا البنات ولا شيرل 

اتصل والدا ستايسي  بالشرطة في إشارة إلى اختفاء ابنتهما من منزل شيرل  بعد أكثر من ستة عشر ساعة على آخر مرة حد شافهم فيها  الشرطة قالت بعد كدا أن مسرح الجريمة  تم إتلافه عن طريق عشرة إلى عشرين شخصًا زاروا بيت شيرل.

 عند وصول الضباط ، دخلوا غرفة سوزي على حد  قولهم انها كانت مكركب يعنى مش نتيجة اعتداءات لا كركبة عاديه بس دا بردوا مش طبيعي على واحده زي سوزي عندها وسواس من الحجات دي زي ما قلنا .معنى كدا ان البنات كانوا نائمين على السرير في وقت ما فى اليوم . وكمان غرفة شيرل السرير بتاعتها نصه مرتب ونصه الغطا متشال كدا وكان في كتاب مفتوح يعنى المنظر بيديك انطباع انها كانت بتقرا وفى حاجه استوقفتها خلتها قامت وسابت القراءة . وما رجعت تانى وممكن يمون هو نفس السبب اللي خلى البنات قاموا وسابوا السرير .

 ودا بياخدنا للقزاز اللي كان مكسور برا ممكن يكون هو اللي لفتهم وخلاهم يقوموا يشوفوا فى ايه .

وكمان الفانوس المكسور بتاع اللمبة الشرطة مالقت بقايا ليه في مكانه حولين اللمبة , معنى كدا ان في حد فكه وكسروه عشان يلفت انتباه ودى كانت ادلة الشرطة اللي كانت في البيت . 

بس فى حاجه تأنيه هي ان سيارة سوزي مكنتش في الجراج ودا شيء غريب على حسب كلام أصحابها انها مستحيل متركن عربيتها في مكانها الا لو في عربيه تانى كانت في الجراج بس عربية مين اللي كانت فى الجراج .

وزى ما قلنا ان شيرل كانت عزباء . يقال ان الشخص دا كان مع شيرل في البيت وكمان مكنش متوقع ان البنات يرجعوا فى الوقت دا . ومش لازم يكون الشخص دا هو الفاعل .

وللأسف الشاهد الوحيد اللي شاف اللي حصل مش ممكن يتكلم , اقصد الكلبة سنامون .في حاجه غريبه كمان لقوها في غرفة سوزي كتب وحجات خاصه بالطقوس الشيطانية . المهم الشرطة بدأت تدور في ماضي البنات. 

المشتبه بهم في اختفاء ال3 فتيات

وبدأوا بسوزي اللي اكتشفوا انها كانت على علاقه بولد اسمه داستن وكان طبعا من النوع المحبب ليها اللي هما الباد بوى . وكان عنده عصابه واتقبض عليهم قبل اختفاء البنات بفترة بتهمه نبش القبور عشان يسرقوا منها . وسأبته في الوقت دا بسبب الحوار دا وشهدت عليه في المحكمة .

وكدا اصبح في مشتبه به وليه دافع كمان واتحقق معاه هو عصابته وعرضوهم على جهاز كشف الكذب بس عدوا من الجهاز وانكروا انهم يعرفوا حاجه عن البنات . وهو فعلا مشكلته كانت مع سوزي حبيبته السابقة يخطف ليه أمها وصاحبتها .

المشتبه به الثاني كان بارت اللي هو اخو سوزي بس بارت كان منبوذ من البيت لأنه كان بشرب مخدرات وعدواني عشان كدا مكنش عايش معاهم وفى اخر فترة كانت سوزي بزوره وسعات بتنام عنده عشان تحسن العلاقة بينهم لأنه كان خلاص اتعالج وبطل يشرب . لكن للأسف هو رجع للشرب تانى وعلاقتهم توترت تانى .ولما سالته الشرطة كنت فين وقت الحادث واليوم اللي قبله وقال انه كان بشرب مع واحد من الجيران . ودا الكلام اللي اكدوه الجيران وكمان عدى من جهاز كشف الكذب ,عشان كدا استبعدوا بردوا.

بعدها ب6 شهور شخص اتصل ببرنامج مخصص للمطلوبين الأكثر في اميركا وقال انا اعرف معلومات عن المخطوفين . اللي رد عليه قاله ثواني ها احولك لمركز شرطه  سبرينج فيلد بس هو قفل الخط وناشدوا في البرنامج انه يتواصل معاهم او مع الشرطة بس طبعا ما تواصل مع حد تانى .

المشتبه به الثالث كان روبرت كوكس كان مسجون في تكساس عشان جريمة قتل وخطف وكان مشتبه بيه في جريمة قتل في فلوريدا قبل كدا بسنين . بس هو كان عايش في سبرينج فيلد في وقت الحادث عشان كدا استجوبوه وقال انه كان مع صديقته في الكنيسة وقتها وهى اكدت كدا .بس بعد ما اتقبض عليه المرة الثانية هي انكرت الكلام دا وقالت ان هو اللي خلاها تقول كدا وقال كمان في مقابله تليفزيونيه انه متأكد ان 3 نساء ماتوا ومستحيل يلاقوا جثثهم  وقال كمان انه مش يقدر يتكلم غير بعد وفاة والدته. مع انه ممكن يكون هو الوحيد اللي ضمن  المشتبه به كلهم اللي مشكوك في امره 100% بس مفيش دليل قاطع عليه .ونضطر نستني والدته تتوفى عشان نعرف الحقيقة .

تحديث في قضيه The Springfield Three

يوم 7 يونيو سنه 1997 يعنى فى نفس  اليوم اللي اختفوا فيه تم اعلان وفاة الـ 3 فتيات بشكل قانونيا بس ملف القضية مازال مفتوح لحد اليوم . 

في حاجه غريبه تانى في سنه 2007 ، كان في  مراسلة متخصصه في الجرائم اسمها كاثي بيرد ، كان فى حد له علاقه بالأرواح والدجل قالها ال3 جثث مدفونه في باركين بتاع مستشفى كوكس ،هي بلغت الشرطة بس طبعا مفيش أي دليل على كلامها ما حد صدقها  هي استأجرت مهندس ميكانيكي لمسح باركين السيارات باستخدام رادار مخترق للأرض (GPR)

ووجد المهندس ثلاث اجسام غريبه اثنين متوازيين وواحد بالطول وبنفس الحجم تقريبا وقالها ان دي شبه الاجسام اللي بلاقيها في مواقع المقابر وهنا هي صورت الكلام دا عشان يكون معاها دليل تقدمه للشرطة .بس كان رد الشرطة غريب وقتها هو ان تكلفه الحفر والبناء عالية جدا عشان جثث قد تكون تحللت أصلا دا لو هما فعلا موجودين في المكان .

دا وكمان مش ها يكون في دليل على الفاعل وكان حجتهم القوية ان الجراج دا اتبنى بعد الحادثة بسنة تقريبا . كاثي عملت مقابله في برنامج تحقيقات وقالت انها عارفه ايه اللي حصل ودا حصل في أواخر الليل بس مش تقدر تتكلم ، وكان واضح انها متوترة . المذيعة قالتها انتى ليه عملتي مقابله معانا طالما مش تتكلمي . وبتقولي ان حد نصحك انك تسيبي القضية وتهددت طب ليه كل دا .

القضية بصراحة غريبه جدا وفيها تفاصيل مش مرتبطة ببعض وكلام كاثي دا اللي غير تفكيري ناحيه القضية خلاني فعلا عايز ادور على حل للقضية .

والسؤال المهم مين اللي مقصود فيهم اصل مش معقول يكونوا كلهم مقصودين في الخطف ؟

وفى النهاية كالعادة حابب اعرف رايك في اللي حصل وها تابع  تعليقاتكم .