وبعد انتهاء خطر فانتوم كيلر اللى اتكلمنا عنه ، ظهر سفاح اسطورى غامض بس بعد 25 سنه ودا لحد النهارده جرايمه غامضه ولسه لحد دلوقتى قضيته لغز محير .ومن كتر اجرامه وغموضه كان دايما بيستهتر بقوى الامن والشرطه دا غير انه كان بيبعت رسايل مشفره لاهالى الضحايا .
 |
| القاتل المتسلسل زودياك |
السفاح او القاتل المتسلسل زودياك
جرائم السفاح ده غريبه جدا وغامضه ولحد النهارده محل اثارة ورعب وجدل طيب مين هو زودياك؟
زودياك هو قاتل متسلسل روع شمال كاليفورنيا فى ستينات القرن اللى فات وتم تصنيف قضاياه على انها الاكثر غموض، والتحقيقات الخاصه بالقضيه دى كان فيها مشتبه بيهم كتير بس محدش فيهم تم اتهامه رسميا .
وبحسب التقارير ارتكب السفاح ده خمس جرايم مؤكده لانه بعت للشرطه والصحف والمجلات رسايل مشفره كان بيأكد من خلالها ارتكابه 37 جريمة قتل على حسب كلامه ولكن تم توثيق 5 جرائم فقط فى سجلات الشرطه
جرائم القاتل المتسلسل زودياك
الجريمه الأولى : zodiac
فى يوم 20 /12/سنه 1968 كان فى شخص اسمه ديفيد فريدى ودا عنده 17 سنه ، وصديقته بيتى ودى عندها 16 سنه . وكان فى بينهم معاد على انهم يتقابلوا فيه ، ويروحوا يحضرواحفلة عيد ميلاد فى مدرسة هوجان الثانويه ، وبعد ماخرجوا من البيت .
راحوا على مطعم وبعدها طلعوا على طريق بحيرة هيرمان ، ودا طريق كله مطبات وحصي يعنى بأختصار طريق يشبه الطرق الزراعيه .ومن هنا بدأت القصه ، هما وقفوا على الطريق دا الساعه 10.15بسبب الحجاره ولما جات الساعه 11 كان فى زوجين معدين من نفس الطريق .
وهما هومر وبيغى لقيوا عربيه ديفيد واقفه وشافوا اتنين قاعدين فيها وكان كل ما بيدى اضاءه بكشاف العربيه بيتى تحط راسها على كتف ديفيد، وفى كمان واحد تانى شاف عربيه ديفيد واقفه وكمان كان فى عربيه اتنين صيادين ودول من نفس المكان وكان فى عربيه تالته واستغرب ان فى 3 عربيات واقفين فى المكان دا .
بس معملش اى رد فعل وكمل شغله عادى لأن هو مشرف ورديه في محطه نفط وفى حوالى الساعة 11.15وركز معاياة يا صديقي في الساعة بالتحديد كان في واحده اسمها استيلا مروحه بيتها وهى ماشيه بالعربية شافت ديفيد واقع من باب العربيه اللى قدام والبنت واقعه على جمبها .
وبلغت الشرطه على طول وبدء التحقيق فى الجريمه ولكن مفيش اى تفسير واضح او اجابه محدده لسبب القتل ، وديفيد كان معاه خاتم هيقدمه لصديقته والخاتم دا كان موجود ، ولقيوا كل حاجه معاهم كانت موجوده وبكدا يكون القتل بدافع السرقه منعدم .
وكل المعلومات دى من نص التحقيقات ومتنساش المصادر موجوده بأخر المقال .
الجريمه الثانيه : zodiac
فى يوم 4 يوليو سنه 1969 كان الشاب مايكل وده عنده 19 سنه وصديقته دارلين وعندها 20 سنه كانوا بيلفو شويه بالعربيه فى الليل وفى حدود الساعه 11.45 دخلوا حديقه اسمها بلو روك سبرينج ودى فى مدينه فاليجو بكاليفورنيا ووقفوا شويه فى الحديقه يتكلموا مع بعض وكان فى عربيه جات جمبهم وهدت.
واللى فى العربيه دى بص عليهم ومشي تانى ، وبعد 10 دقائق رجعت العربيه تانى بس ركنت وراهم ، ونزل منها واحد ماسك كشاف يدوى ومسدس ووجه الكشاف على عيون دارلين وصديقها وبدون اى كلمه راح ضارب 5 رصاصات ورا بعض اصيب الاتنين دارلين ومايكل .
وبعدها بعد القاتل عن العربيه .وهو ماشي سمع صوت حد بيتالم رجع تانى بسرعه وضرب طلقتين على كل واحد فيهم .مايكل برغم الطلقات دى كلها والاصابات اللى فيه كان فيه الروح وشاف الراجل ده .
بعدها كان فى 3 اصدقاء شافوا مايك وهو مرمى على الارض وبلغوا الشرطه على طول . وتم انقاذ مايكل بس دارلين ماتت وتانى يوم على طول اتصل شخص مجهول بنانسي سلوفر ودى مراسله للشرطه فى فاليجو .
واعلن مسئئوليته عن الحادثه واعلن كمان انه مسئول عن الجريمه السابقه . الشرطه تتبعت المكالمه ولقيوا انه كان بيتكلم من كشك فى الشارع قريب من بنزينه سبرينغز والمكان ده قريب من قسم شرطه فاليجو وقريب بردو من بيت دارلين يعنى فى نص المسافه تقريبا ، وبدأت الشرطه التحقيق فى القضيه.
ولان مايك لسه عايش استجوبوا واداهم اوصاف المجرم اللى شافه وطبعا محددش ملامحه 100 % ودا لان الكشاف كان ماثر على عنيه ومخليه مش شايف حاجه .
حاولت الشرطه تفك لغز القصه دى واتضح ان دارلين كانت متزوجه .ولكن زواجها دا انتهى بمشاكل وشكوا ان زوجها هو اللى عمل كدا ومن خلال التحقيق تم تبرئته وكمان حققوا مع الشخص اللى كان على علاقه بيها وكان هيتجوزها ودا عضو فى البحريه الامريكيه ومكنش موجود فى المدينه اصلا لحظه وقع الجريمه .
لانه كان فى مهمه عسكريه خارج البلد وتم تبرئته من القضيه .وبعد ماحصلت الجريمه دى بنص ساعه اهالى دارلين قالوا ان اتصل بيهم رقم مجهول ومتكلمش ولا قال اى حاجه هما كل اللى سمعوه صوت تنفسات شديده والشرطه علقت على المكالمه دى وقالت ان الشخص ده يعرف دارلين واهلها كويس .
ولكن بالتحقيق مع اهالى واصحاب دارلين اكتشفوا ان كان فى شخص غريب كان دايما يفضل واقف قدام البيت وبيقعد فى عربيه شيفروليه وكمان صحابها فى الشغل اكدوا المعلومه دى وقالوا ان فى شخص غريب جالها مرتين وكان دايما بيسلمها طرود .
تحقيقات فى الجريمه الأولى والثانيه للقاتل المتسلسل زودياك
وبعدها فى يوم 31 يوليو استلمت 3 صحف رسايل منفصله وكل رساله كانت عليها علامه بحرف مكتوب بخط اليد ومكتوب بشكل مائل اختلفت الثلاث رسايل عن بعض فى كام حاجه بسيطه كدا بس كلهم كان فيهم نفس التحيه والتوقيع والمعلومات الاساسيه .
وبدأ ت كل رساله بعزيزى المحرر وبعدها اعلن مسئوليته عن عمليات اطلاق النار فى الجريمتين اللى اتكلمنا عليهم .والرسايل دى كانت بتحتوى على وصف مفصل ودقيق للجريمتين دول ، والغريب ان التفاصيل دى وقتها محدش كان يعرفها غير رجال الشرطه والمسئولين عن القضيه دى .
وكان من ضمن التفاصيل دى نوع الزخيره المستخدمه فى كل عمليه اطلاق نار ، وملابس الضحايا وموقع اصابتهم ، وفى كل رساله كان فى جزء مشفر بيتكون من ارقام واحرف مع بعض .
وكل صحيفه اخدت 3 شفرات يعنى لو جمعنا التلات شفرات هيبقي معانا شفره ورساله كامله . ولو جمعناها المفروض هنعرف شخصية القاتل ده.
وطالب كل صحيفه بوضع الشفرات دى فى الصفحة الاولى للجريده وهددهم ان الصحيفه اللى مش هتنفذ كلامه وتحط الشفره فى الصفحة الاولى اكيد طبعا عارفين ايه اللى ممكن يحصل .
ملاحظه : لحد هنا هو مكنش حدد لنفسه اسم معين او لقب واسم، زودياك اللى اتشهر بيه دا كان موجود فى رساله كان باعتها المجرم الى جريده سان فرانسيسكو "the sun francesco "
يوم ٧ اغسطس وفى الرساله دى ذكر الزودياك تفاصيل اضافيه للجرائم اللى ارتكبها ووالتفاصيل دى الشرطه نفسها والمسئولين مكانوش يعرفوا حاجه عنها ..ودا بس عشان يأكدلهم ان هو اللى ارتكب الجرائم دى وكمان اكد ان الحل لفك لغز هويته فى فك الشفرات اللى ارسلها فى الرسائل السابقه .
وبعدها قام شخص اسمه دونالد وهارد بفك الشفره الاولى ، ولما فكوها لقيوا ان الزودياك بيقول انه
بيقتل الناس عشان دا امر مسلى وكمان بيمنحه الاثارة الشديده وكمان عارف انه هيدخل الجنه بعد موته وعشان كدا هو بيقتل اكبر عدد من الناس عشان يكونوا عبيد له فى الحياه الاخرى
متخيل !!! بس الغريب انهم لما فكوها ملقوش اى نص بيدل على هويته وكمان كاتب انه مش هيكشف عن هويته عشان لو كشفها هتتوقف عملياته لجمع العبيد .
ومن هنا اكتشفت الشرطه ان الشخص دا مش هيستسلم ولا هيتوقف عن عمليات القتل . ومن هنا بدأ الغموض والجرائم تزيد.
الجريمه الثالثه للقاتل المتسلسل زودياك zodiac
وفى يوم 27 سبتمبر سنه 1969 اتنين طلاب عملوا رحله ليوم واحد الى بحيرة بيريسا ، ودى اكبر بحيره فى مقاطعة نابا يعنى على بعد ساعه واحده من شمال فاليجو .
وكانت سيليسيان ودى عندها 22 سنه وصديقها براين وعنده 20 سنه بيتنزهوا فى منطقه هاديه وكانوا قاعدين واقترب منهم شخص ,وكان لابس ملابس سوداء بالكامل ولما لاحظ انهم شافوه وقف ورا شجره سيلسيان شافته وهو ماسك مسدس راح طلع من ورا الشجره وكان لابس نضاره سودا كبيره وكان فى دايره مرسومه على صدره وجواها صليب .
قرب منهم وكان موجه المسدس عليهم ، ولما سالوه انت مين وعايز مننا ايه . قالهم اناهارب من السجن ولسه قاتل حارس السجن ، وقالهم كمان عايز مفاتيح عربيتهم والفلوس اللى معاهم عشان يهرب للمكسيك .قام براين طلع المفاتيح والمحفظه ورماهم جمبه ، وبعدها رمى الراجل قطعه قماش وقال لسيلسيان اربطى ايدين براين وبعد ما ربطتهم راح الراجل ربط ايديها هى كمان .
وهو بيربط سيلسيان براين عرض عليه المساعده اكتر من كدا سواء من الناحيه الماديه او القانونيه رفض الراجل وبراين كان مفكر ان الموضوع عباره عن جريمه سطو عاديه بس بعد ماخلص طلع سكين وطعن براين 6 طعنات وصديقته 10 طعنات .
وبعدها راح لعربيه براين وكتب عليها فاليجو 12-20-68 4 -7-69وكمان 27-9-69 الساعه 6:30 bx- knife و دا تاكيد على انه مرتكب الجرائم السابقه والجريمه دى، وفى الساعه 7.40 تلقي مركز الشرطه مكالمه من القاتل واخبرهم فيها بارتكابه الجريمه.
وتم العثور على الهاتف فى مغسلة عربيات قريب من مكتب الشرطه وتم رفع البصمات بس مفيش بينها وبين اى بصمات موجوده فى الشرطه تطابق نهائي وفى لحظه القتل كان فى راجل وابنه بيصطادوا وسمعوا صوت انين والم وراحوا يشوفوا فى ايه واتفاجءوا بوجود اتنين مطعونيين بلغوا الشرطه فورا ولما وصلت الشرطه كانت البنت لسه عايشه وقادره تتكلم .
واديتهم مواصفات القاتل قبل ما تدخل فى غيبوبه وبعدها ماتت والشاب براين نجى من الحادثه دى وقال الشرطه كل اللى حصل.
الجريمه الرابعه للسفاح زودياك zodiac
وبعدها حصلت جريمه تانى وركزز معايا يا صديقى لان دى اخر جريمه ذكرت لزودياك وموثقة فى الحكومه بس طبعا فى جرائم كتير مش موثقه وانا بقولك بس الموجود وركز فيها عشان فيها تفاصيل كتير .
فى 11 اكتوبر 1969 كان فى سواق اسمه بول وقفه راجل ابيض وطلب منه يوصله مكان محدد والسواق دا دخل شارع غلط ومحدش عارف ليه وبعدها قام الراجل اللى ركب معاه طلع مسدس وضرب طلقه وحده على راس السواق وراح اخد محفظته ومفاتيح العربيه
وقطع حته من القميص وعليه دم السواق.
والجريمه دى شافها 3شباب واتصلوا بالشرطه وبلغوهم بكل حاجه ، وصلت الشرطه وفى منهم اتنين شافوا راجل ابيض بيعدى قريب من مكان الحادث وبيدخل فى احد البيوت الراجل دا بحسب اقوال رجال الشرطه بتتطابق اوصافه مع الاوصاف اللى قالها المراهقين اللى بلغوا عن الحادث بس ليه لما شافوه مقبضوش عليه ؟
ودا لان جهاز الارسال الخاص بالشرطه طلب من عناصر الدوريات انهم يدوروا على شخص مشتبه به اسود البشره وعشان كدا اللى 2 محطوش فى دماغهم الراجل الابيض ومكانوش عارفين مواصفاته اللى ذكروها الشباب غير بعدها بفترة . والشرطه اعلنت عن الحادث بهدف السرقه .
والموضوع ده اتكلم عنه الزودياك فى احد الرسائل بتاعته وقال انه فعلا اتكلم مع اتنين من رجال الشرطه ومحدش فيهم قدر يتعرف عليه ودا اللى غير تفكير الشرطه عن ان الحادثه بهدف السرقه وتم توثيقها فى ملف الزودياك وبعدها بعت رساله ومعاها قطعه القماش اللى من قميص السواق لانه ادايق وزعل خالص لما الشرطه اعلنت ان الجريمه بهدف السرقه .
كمان الرساله نفسها كانت شديده اللهجه واكد انه هو اللى ارتكب الجريمه وقطعه القميص دى تثبت كلامه .وهنا نلاحظ انه قتل سواق يعنى شخص راجل بس مش اتنين من الازواج زى ما احنا متعودين على جرايمه .
والسبب دا محدش فسره وبعت رساله للجريده مع قطعه تانى من قميص السواق وهدد فيها القاتل بانه هيقتل اطفال المدارس وهما فى الاوتوبيس .
وقال كمان
انا سوف اطلق الرصاص على العجله الاماميه ، وانتوا ابدأوا بلم الاطفال وهما بيتطايروا من الاتوبييس .
يوم 8 نوفمبر 69 ارسل زودياك رساله مشفره كمان للجرايد المحليه تحتوى على 340 شفره بقيت غير محلوله حتى 5 ديسيمبر 2020 يعنى بعد 51 سنه تم حل الرساله دى من خلال مهندس البرمجيات الامريكى ديفيد و عالم رياضيات تانى، ومبرمج بلجيكى ،
ونفى الزودياك انه هو سام الشخص اللى سبق وقال للحكومه انه بيخاف من غرفةالاعدام . لان الاعدام زمان كان من خلال الغاز .وكمان هو مش بيخاف من غرفه الغاز لان هى دى الطريقه اللى هتبعته للجنه بشكل اسرع،
وانه جمع ما يكفيه من العبيد لخدمته هناك عشان تبقي حياته حياه ساهله عكس الباقيين اللى مش معاهم اى حاجه للحياه التانيه واستمرت الرسائل توصل للصحف وكلها كانت تهديدات بتفجيرات وكمان رموز اكتشفوا بعد فكها انها احداثيات لمواقع الجراءم اللى ارتكبها الزودياك . ورسائل غريبه مش مفهومه وبيصر انه قتل 37 شخص بس الشرطه ربطته ب5 جرائم قتل بس .
تحقيقات فى جرائم السفاح زودياك zodiac
وبالفعل عملوا تحقيقات موسعه وجديه اكتر وبدأو من اول جريمه حصلت حتى اخر جريمه بس موصلوش لحاجه برغم من ان عدد الاشخاص اللى حققوا معاهم فعليا وصلوا 2500 شخص ولكن دون جدوى
ابرز المشتبه فيهم هو ارثر الين وده استاذ فى مدرسه سبق اتهامه بالتحرش فى المدرسه اللى كان شغال فيها وكان بيتحرش بالاطفال اللى فى المدرسه .وبدأت التحقيقات معاه فى 6 اكنوبر 69 واستمر استدعائه للتحقيق لاكثر من 20 عام
ودا لان اغلب اصدقاه اخبروا الشرطه برغبته فى قتل الناس واستخدامه لاسم زودياك بشكل متكرر وتم القبض عليه عام 74 بتهمه التحرش بطفل 12 سنه واعترف وكان فى ادله كتير حواليه ودا اللى اثبته سلوكه وانه تم طرده من الجيش والمدرسه اللى كان شغال فيها وابرز دليل لما الشرطه عثرت على اله طباعه الرسائل كانت بتستخدم فى
طباعه الرسائل بشكل خاص عام 94 واحد الرسائل اللى ارسلها زودياك الى الشرطه كانت مكتوبه باله كاتبه شبيهه باللى لقيوها عنده وكان دايما بيلبس ساعه يد من ماركة زودياك وكمان مكان اقامته كان جمب منزل احد الضحايا وموقع القتل . بس عام 2002 شرطة فرانسيسكو عملت فحص للحمض الوراثي واللى اخدوه من الطوابع اللى الزودياك كان بيحطها فى رسائله وقارنوها مع الحمض الوراثى المحفوظ لارثر وكانت النتيجه انه مفيش تطابق . وخبير الخط لويد ،
اكد بعد دراسه المئات من الكتابات ارثر انه لا تشابه بينه وبين الرسائل بتاعه زودياك وتم اسبعاد ارثر من المشتبه بهم.واستمرت النحقيقات وبقيت القضيه مفتوحه دون اسم واضح حتى 6 اكتوبر 2021عندما اعلن فريق كايس بربكير
ودا فريق مكون من 40 شخص من المحققين وافراد الشرطه سابقين. ان الزودياك هو جندى سابق فى سلاح الجو الامريكى غارى بوست واتوصلوا للمعلومه دى بعد سنوات من الدراسه والبحث .بدأت من خلال بلاغ من قرايب غاري بوست الى جريده سان فرانسيسكو اخبرهم فيه بان غارى هو الزودياك وحاول قتله بمطرقه ومن نفس الجريده دى كان فى خبر منقول عن زوجه بن بوست وهى ميشبل وتؤكد ان غاري بوست هو الزودياك
وانها انفصلت عن زوجها وبعدت من المدينه عشان دايما كان بيهددها بالقتل .وراح الفريق لمنزل بوست اللى اتوفى فى سنه 2018واكتشفوا ان فى غرفه منعزله ومظلمه فيها صور ورسايل مشفره للسفاح الشهير . فاكرين الشباب التلاته اللى بلغوا عن جريمة قتل السواق . دول كانوا ادوا وصف للشرطه عن القاتل
والفريق اكتشف ان فى ندوب على وش غاري تشبه الندوب اللى الشباب كانوا وصفوها وحروف اسمه الكامل لها علاقه كمان بتفسير الرسائل المشفره اللى ارسلها الزودياك الى الصحف .
وقال الفريق انه مقتنع ان زودياك هو بوست .بس رأى الشرطه كان مختلف واعتبروا ان كل اللى وصل له الفريق عباره عن تكهنات بسبب ان المشتبه به مات ومش هينفع يستجوبوه او يحصلوا على اعتراف منه . واعلنت السلطات ان القضيه مازالت مفتوحه .متنساش يا صديقى تكتبلي رايك فى الكومنتات هل الزودياك هو فعلا غارى بوست ولا لسه مجهول ؟
المصادر
